!! نظرية جانجز اوف ايجيبت ؟ معقوله

النهارده شفت فيلم
لمارتن سكورسيزى (Gangs Of New York)
(mbc2)عال
و رغم انى شفت الفيلم ده اكتر من مره قبل كده لكن المره دى فكرت فى اللى بيحصل فى بلدنا وانا باتفرج عليه ووصلت لان الفرق مش كبير ...0
حقيقى لو اتفرجت عالفيلم واتخيلت نيويورك هى بلدنا
ها معايا ولا لا؟؟؟

على فكره مش هاتتعب كتير لان الفارق مش كبير بين نيويورك اللى ظاهره فى الفيلم (سنة 1863 ) واى مدينة مصرية الايام دى
ممكن يكون فى فرق واحد....... العربيات ودخانها

لو قارنا مثلا بين ال(نايتف امريكانز) والحزب الوطنى هنلاقى الفرق برضه مش كبير
دول ناس فرضوا نفسهم على الاخرين بحجة انهم الاغلبية انهم الاصحاب الحقيقيين للارض رغم انهم زيهم زى منافسيهم مجرد مهاجرين استوطنوا الارض اللى بيخاقوا علي السيطره عليها

فى مصر عندنا الحزب الوطنى اللى لو ماكنتش منهم ماتبقاش مصرى حقبيقى
افكارهم وارائهم لازم تمشى لان هم اللى عارفين مصلحة البلد

مع التركيز على اهم عنصر اتفاق بينهم وهو ان المنافسه غير مقبولة وقدامك اختيار من اتنين اما معاهم او ضدهم (عقلك فى راسك تعرف خلاصك) زى ما اتعودت اسمع جدتى بتقول

وطبعا فى الناحيه التانيه عندنا المنافس الرئيسى الممنوع ذكر اسمه بعد اخر هزيمه ليهم واللى كانوا فى الفيلم ال(ديد رابيتس) و اكيد اول كيان ممكن نطبق عليه المعطيات دى هما طبعا الجماعة المحظوره ...الاخوان المسلمين

طبعا ممكن نتخيل ان فى مشكله فى الربط بين ال(ديد رابيس) والاخوان لان فى الفيلم كانوا مجرد لصوص مهنتهم السرقه
لكن ان باقول ان الموضوع ده مش مشكله
اكيد مش هاردد الكلام اللى بيتقال عن فلوس الاخوان جت منين ورايحه فين انا ماليش دعوة بالكلام ده
المحكمه هى اللى تقول.......... حتى لو كانت عسكريه

فى موضوع السرقه ده انا هاتكلم عن محل الجريمه اللى هو كان فى الفيلم فلوس الناس
لكن فى مصر عندنا الاخوان اللى هم حراميه عقول مخضرمين اشغالهم مزدهره فى الجوامع والجامعات والمحطات الفضائيه اللى بتروج لافكارهم

وطبعا عندنا المهاجرين الايرلنديين المغلوبين على امرهم و اللى مالهمش علاقه بكل اللى بيحصل رغم ان كل شىْ بيحصل من حواليهم هو خناقه عليهم همّا
والكلام ده بيظهر فى مشهد يموت من الضحك -على اساس فكره ان شر البلية ما يضحك-لما يقف مهاجر طاظزه لسه نازل من السفينه اللى جايه من ايرلندا قدام مسؤل التجنيد اللى ماسك وقتين فى ايديه واحده يمين وواحده شمال و بيقول (دى وثيقه جنسيتك انت دلوقتى مواطن امريكى ،ودى وثيقه تجنيدك يلا روح دافع عن بلدك) ويشاورله عل سفينه بتنزل توابيت موتى الجبهة وبتحمل بدلهم عساكر جدد يا دوب واقفه على بعد خطوات من السفينه اللى نزل منها اصلا،والراجل يا عينى كل اللى بيسأله لزميله اللى طالع معاه يا ترى هايأكلونا امتى

مابيفكركش الكلام ده بشعبنا اللى بقى يضرب بيهم المثل فى السلبيه والا مبالاه
الشعب المصرى اللى مبقاش شايف قدامه غير لقمه العيش

طبعا انا مانسيتش باقى اجنحة المعارضه اللى كانوا بيمثلهم فى الفيلم طبقه السياسيين الااغنياء اللى مايهمهمش من الشعب غير اصواتهم فى الانتخابات ولتحقيق ده كانوا بيدوروا على اى تحالف يحقق المصالح بتاعتهم سواء مع النيتفز او الرابيتس
مع الفارق طبعا غنى المال غير غنى الثقافه والفكر مع ان النتيجه واحده فى الاخر فى الحالتين هما كانوا بعاد جدا عن الشعب

زى ما شفنا طبعا الفارق مش كبير بين فيلم سكورسيزى وحياتنا فى مصرلو بس يقل شوية دم من اللى فى الفيلم هاتحس ان الفيلم بيحكى قصه جانجز اوف ايجيبت مش نيويورك

مع انى ماظنش ان الدم هايفضل بعيد كتير عن مواجهات عصابات مصر

اتمنى فعلا اكون غلطان